Quintana asegura que o complemento autonómico para o desemprego beneficiará a máis de 42.000 mulleres

O candidato do BNG á presidencia da Xunta, Anxo Quintana, pechou hoxe en Santiago de Compostela o Acto Nacional da Igualdade do BNG nesta precampaña ao que asistiron máis de 1.300 persoas, na súa inmensa maioría mulleres, procedentes de todos os recunchos de Galiza.Neste acto, no que participaron tamén as candidatas Carme Adán, Ana Pontón e Teresa Táboas, Quintana detallou algunhas das desigualdades ás que se teñen que enfrontar as mulleres do noso país e que o BNG quer atallar desde o seu labor no Goberno.Nomeadamente, o candidato nacionalista destacou o complemento autonómico para o desemprego que o nacionalismo quer poñer en marcha e que beneficiará a máis de 60.000 persoas en todo o país, “este complemento beneficiará a máis de 42.000 mulleres que precisan un esforzo suplementar, porque as mulleres tamén padecen máis o paro que os homes”.O líder do BNG lembrou tamén neste sentido a creación do complemento autonómico para as pensións máis baixas que tamén beneficia, na súa maior parte, a mulleres que son nun 70% as destinatarias desta prestación

.Igualdade por lei

Así, Quintana apostou por un Novo Estatuto “que debe ser unha carta de dereitos e deberes e por iso proporemos que figure en el o complemento autonómico das pensións e do paro como unha medida universal que ninguén poderá negar ás mulleres e homes deste país”. Nesta liña lembrou que o salario da liberdade tense establecido “con rango de lei tamén para que non dependera da vontade do goberno de turno”.O cartel nacionalista amosouse especialmente emocionado neste acto que iniciou lembrando que o nacionalismo “é igualdade entre as persoas, igualdade de dereitos e oportunidades e por iso, cando o BNG chegou ao goberno o primeiro que fixo foi ubicar na vicepresidencia as responsabilidades de igualdade porque queriamos que comprometeran ao conxunto do goberno”. Así, indicou que “grazas ao labor feito polo BNG, convertemos á Xunta nun dos gobernos europeos máis comprometidos coa igualdade”.O número un do BNG indicou que “se existe unha estratexia de infraestruturas, por que non a vai haber en igualdade?” e indicou que “así o fixo o BNG e puxémolo en práctica para conseguirmos que as mulleres e os homes sexan iguais en dereitos e iso é bo tamén para o conxunto da sociedade”.

Benestar

Anxo Quintana detallou o labor feito en materia de benestar e igualdade como a creación do Sistema Galego de Benestar “a través do que se crearon 57 centros de día, incrementamos as prazas en educación infantil e temos traballado en políticas de corresponsabilidade”, neste sentido, Quintana dixo que, “cando pomos en marcha estes servizos facémolo coa seguridade de que estamos poñendo en marcha servizos que axudan a que as mulleres teñan tempo para elas”.O vicepresidente da Xunta lembrou que con estas medidas “aportamos á sociedade unha educación de calidade, unha atención axeitada e tamén creamos emprego”. Nesta liña explicou que o Sistema Galego de Benestar ten creado máis de 1.600 postos de traballo dos que o 94% son mulleres.No referido ao eido das galescolas, Anxo Quintana lembrou que hoxe en día existen 215 prazas de educación infantil e criticou que Alberto Núñez Feijóo teña asegurado que “se chega ao goberno vai desfacer o que nós fixemos. Un país non se constrúe destruíndo, senón construíndo”.

“Precísase feminismo na política e non só presenza de mulleres”

A cabeza de lista do BNG pola provincia de Pontevedra, Teresa Táboas, centrou o seu discurso da loita pola igualdade das mulleres no nivel político: “A paridade debe ter a súa traslación na política. Precísase feminismo, non só presenza de mulleres. As mulleres que facemos política temos límites pero tamén oportunidades. Podemos comportarnos cos roles do machismo, pero tamén podemos aportar outra sensibilidade, aportando unha política máis humanizada”. Para Táboas, “as cotas teñen o seu sentido, pero cómpre actuar con sensibilidade para levar a paridade aos niveis intermedios”. Ademais, avogou por “dar prestixio e visibilidade ás mullerea s nos medios de comunicación”. Segundo a candidata nacionalista, “debemos lembrar sempre que a sociedade está formada por homes e mulleres e desde a acción política debemos dotar á sociedade das ferramentas que permitan a conciliación entre vida persoal e laboral”.Mais tamén tivo unha mención para a historia do noso país, marcada pola emigración: “Somos Galiza, un país que viu como os homes marchaban fóra mentres as mulleres quedaban aquí para sacar adiante, con enorme esforzo, os seus fillos. Este país ten unha enorme pegada das súas mulleres.Táboas lembrou, á introdutora da idea da paridade no ano 1880, Hubertine Auclair, sinalando que “no seu día foi unha idea revolucionaria, porque a política estaba reservada aos homes”. “Daquela, a igualdade era a reclamación da ausencia de privilexios, mais hoxe sabemos tamén que hai que poñer en valor as diferenzas”, puntualizou. “Temos que chegar á sensibilización social en temas de xénero para chegara á igualdade de oportunidades en todas as situacións. A pesar dos avances segue habendo moito camiño por andar”, dixo.Táboas concluíu o seu discurso cunha cita de Amelia Valcárcel: “A igualdade entre xéneros terá chegado cando as mulleres podamos cometer os mesmos erros que os homes sen que se nos insulte por iso”.

“O nacionalismo é igualdade entre homes e mulleres”

Pola súa parte a candidata número dous do BNG pola provincia da Coruña, Ana Pontón, salientou que “se algo é o nacionalismo é defensa da igualdade, queremos que homes e mulleres teñamos os mesmos dereitos e oportunidades”. Neste sentido, Pontón subliñou “que os dereitos das mulleres tiveron por primeira vez un aliado na Xunta de Galiza” coa chegada do BNG ao Goberno galego hai tres anos e medio. “Tivo que chegar o nacionalismo á Xunta de Galiza para que cambios importantes para as mulleres, como que accedan á propiedade das explotacións agrarias, establecendo axudas para que cotizaran á seguridade social, para que as redeiras melloraran as súas condicións de traballo, para aprobar unha Lei Galega contra a Violencia de Xénero”, asegurou Ana Pontón. Por iso, a candidata do BNG pediu que o vindeiro 1 de marzo “é fundamental un maior apoio para o nacionalismo e poder así consolidar e avanzar nunha maior igualdade e dereitos para as mulleres”